Detenshonnan pa manehá bou di influensia di alkohòl
Durante e dianan ku a pasa, polis a detené tres(3) shofùr pa manehá bou di influensia di alkohòl.
Djabièrnè 18 di sèptèmber, alrededor di 1.10 or di mardugá, a detené un hòmber di inisial R.E.G.R. di 29 aña di edat riba Bulevar Gobernador N. Debrot. Un patruya riba Kaya Grandi a mira e sospechoso ta manehá un outo ku velosidat haltu den área urbanisá. Pa e motibu aki a dun’é señal pa para pa atendé kuné tokante di su komportashon di manehá. Durante kòntròl, e sospechoso su dokumentunan tabata na ordu, sinembargo e tabata mustra diferente karakterístika di un persona ku ta bou di influensia di alkohòl. Pa e motibu aki a hasi un tèst di supla kuné. A resultá ku e sospechoso a konsumí mas alkohòl ku ta pèrmití pa lei. Durante ku tabata listra e sospechoso, a topa ku dos saku di plèstik ku probablemente supstansia narkótiko i un kuchú den su tas. A konfiská esakinan. E sospechoso a haña prohibishon pa manehá di 2 ora. Ademas a duna un dama ku a buska e sospechoso na warda di polis, prohibishon pa manehá di 24 ora pa motibu ku e tambe a konsumí mas alkohòl ku ta pèrmití pa lei.
Algun ratu despues ku a lag’é den libertat polis a mira e sospechoso ta manehá e mesun outo ku a par’é den dje anteriormente, riba Kaya Soeur Bartola miéntras e tin un prohibishon di manehá. A dun’é señal pa para i a detené pa manehá bou di influensia di alkohòl i pa violashon di e prohibishon pa manehá. Ademas a konfiská e outo i hib’é warda di polis.
Djaweps 17 di sèptèmber, alrededor di 8.30 or di anochi, a detené un dama di inisial M.J.T. di 56 aña di edat riba Bulevar Gobernador N. Debrot. Un patruya a mira e sospechoso ta kore zeilu ku su vehíkulo. Pa e motibu aki a duna e shofùr señal pa para pa kòntròl. Durante kòntròl e sospechoso tabata mustra diferente karakterístika di un persona ku ta bou di influensia di alkohòl. Despues di vários intento, a logra hasi un tèst di supla kuné i a resultá ku el a konsumí mas alkohòl ku ta pèrmití pa lei. A detené i hib’é warda di polis pa un análisis di rosea. E sospechoso a haña prohibishon pa manehá di 4 ora.
Djaweps 17 di sèptèmber, alrededor di 8.20 or di anochi, a detené un hòmber di inisial M.A.M. di 52 aña di edat na Kaya Pauwnee. E sospechoso tabata enbolbí den un aksidente entre dos outo. Konforme e maneho di ‘botsen is blazen’, a hasi tèst di supla ku ámbos sospechoso i a resultá ku el a konsumí mas alkohòl ku ta pèrmití pa lei. A detené i hib’é warda di polis pa un análisis di rosea. A konfiská reibeweis di e sospechoso.
Ademas, tur sospechoso detené a haña prosèsferbal pa manehá bou di influensia di alkohòl.
Detenshon enkonekshon ku diferente kaso di ladronisia
Den oranan di mardugá di djaweps 17 di sèptèmber, Kuerpo Polisial Hulanda Karibense a tene entrada hudisial na un kas den e bario di Nort’i Saliña. Durante e entrada hudisial a konfiská diferente artíkulo ku ta relevante pa e investigashon. Mas lat di mainta, polis a tuma nota di un outo sospechoso den Antriol. A logra blòkia e vehíkulo na Kaya Karpitan i a pasa ofer pa un kòntròl. Durante kòntròl a topa ku e sospechoso ku tabata buska i a detené. Ta trata di un hòmber di inisial T.A.G.D. di 30 aña di edat, sospechá di ta enbolbí den diferente kaso di ladronisia. Tambe a konfiská e vehíkulo ku e sospechoso tabata move den dje pa mas investigashon. Investigashon den e kaso aki ta kontinuá.
Outo na kandela
Djárason 16 di sèptèmber, alrededor di 7.30 or di anochi, ‘meldkamer’ sentral a risibí notifikashon tokante un outo na kandela na Kaya Merengue. Na yegada di polis i brantwer, no tabatin kandela mas, pero a konstatá ku e kompartimentu di motor tabata kompletamente kimá. Brantwer a basha awa riba e motor. No tabatin herido. Korto sirkuito probablemente ta kousa di e kandela.
Kandela den kamber di akomodashon turístiko
Djárason 16 di sèptèmber, alrededor di 7.20 or di anochi, ‘meldkamer’ sentral a risibí notifikashon tokante kandela na un akomodashon turístiko situa na E.E.G. Bulevar. Na yegada di polis i brantwer a resultá ku un kashi di koriente den kamber di e akomodashon, tabata na kandela. Brantwer a paga e kandela. No tabatin herido. Korto sirkuito probablemente ta kousa di e kandela.
Ladronisia di tas
Djárason 16 di sèptèmber a drenta keho di ladronisia di un tas den un bar situá na Kaya Bonaire. Deskonosí nan a bai ku un tas koló di oro, modèl Clutch na momentu ku e doño no tabatin bista riba e tas. Den e tas tabatin entre otro un telefòn di e marka I-phone, modèl 15 plùs i algun produkto personal. Ta investigando e kaso.
Aksidente ku gòlfkar
Djárason 16 di sèptèmber, alrededor di 10.20 or di mainta, ‘meldkamer’ sentral a drenta notifikashon tokante aksidente ku un gòlfkar riba Kaya General Carlos M. Piar. Na yegada di polis a resultá ku un gòlfkar a dal den muraya di un negoshi. Shofùr di e gòlfkar a deklará ku e no por a brek na tempu i a dal den e muraya kantu di kaminda. El a resultá levemente heridá i personal di ambulans a dun’é tratamentu médiko na e sitio mes. Konforme e maneho di ‘botsen is blazen’, a hasi tèst di supla ku e shofùr i no tabatin indikashon tokante uso alkohòl.