Aksidente entre dos outo
Djadumingu 20 di sèptèmber, alrededor di 3.25 or di atardi, ‘meldkamer’ sentral a risibí notifikashon tokante un aksidente ku herido entre dos outo na e krusada ku ta konektá Kaya Papa Cornes i Kaya Vicente F. Gomez. Pa motibu di keda sin duna preferensia, e vehíkulonan a dal den otro. Personal di ambulans a hasi chekeo médiko ku esnan enbolbí i no mester a transportá ningun persona pa hòspital. Konforme e maneho di ‘botsen is blazen’, a hasi un tèst di supla ku ámbos shofùr i no tabatin indikashon tokante uso di alkohòl.
Outo na kandela
Djadumingu 20 di sèptèmber, alrededor di 1 or di mardugá, ‘meldkamer’ sentral a risibí notifikashon tokante un outo na kandela riba Kaya Heru. Na yegada di polis i brantwer a konstatá ku e kompartimentu di motor tabata na kandela. Brantwer a paga e kandela. No tabatin herido. Korto sirkuito probablemente ta kousa di e kandela.
Detenshonnan pa manehá bou di influensia di alkohòl
Durante e fin di siman ku a pasa, polis a detené dos(2) shofùr pa manehá bou di influensia di alkohòl.
Djadumingu 20 di sèptèmber, alrededor di 12.05 or di mardugá, a detené un hòmber di inisial S.O.A.H. di 35 aña di edat riba Kaya Nikiboko Sùit. E sospechoso tabata enbolbí den un aksidente entre dos outo i a bòltu ku su outo. El a resultá levemente heridá i a risibí tratamentu médiko na e sitio mes. Konforme e maneho di ‘botsen is blazen’, a hasi tèst di supla ku ámbos shofùr i tabatin indikashon ku e sospechoso a konsumí mas alkohòl ku ta pèrmití pa lei. A detené i a hib’é warda di polis pa un análisis di rosea. A konfiská su reibeweis.
Djasabra 19 di sèptèmber, alrededor di 8.30 or di anochi, a detené un hòmber di inisial J.A.R.P. di 23 aña di edat riba Kaya Gilberto F. (Betico) Croes. E sospechoso tabata enbolbí den un aksidente entre dos outo. Konforme e maneho di ‘botsen is blazen’, a hasi un tèst di supla ku ámbos shofùr i tabatin indikashon ku e sospechoso a konsumí mas alkohòl ku ta pèrmití pa lei. A detené i a hib’é warda di polis pa un análisis di rosea. E sospechoso no por a mustra un reibeweis i a haña but.
Ademas, ámbos sospechoso detené a haña prosèsferbal pa manehá bou di influensia di alkohòl.
Detenshon pa ladronisia di ‘fatbike’
Djasabra 19 di sèptèmber, alrededor di 6.35 or di anochi, a detené un mucha hòmber di 15 aña di edat na warda di polis. Ta sospechá e menor di edat di ladronisia di un baiskel eléktriko (fatbike) i ‘Airpods’ na altura di un parke riba Kaya J.N.E. Craane. Despues di investigashon mas aleu a topa ku e baiskel na un kas na Kaya Piedr’i Mula i a konfiská esaki pa mas investigashon.
Ladronisia for di pikòp
Djasabra 19 di sèptèmber a drenta keho di ladronisia for di un vehíkulo stashoná na e sitio di sambuyá ‘1000 steps’ riba Kaminda Turístiko. Deskonosínan a destruí bentana di un pikòp i a bai ku dos tas. Ta trata di un tas di e marka ‘Oakley’ i e otro tas su marka ta deskonosí. Den e tasnan tabatin entre sèn kèsh, karchi i brelnan. Ta investigando e kaso.
Skuter na kandela
Djasabra 19 di sèptèmber, alrededor di 5.30 or di mainta, ‘meldkamer’ sentral a risibí notifikashon tokante un mondi na kandela riba Kaya Theresa F. Ilario. Na yegada di brantwer a resultá ku ta trata di un skuter na kandela. A konfiská e skuter pa mas investigashon.
Lòsmentu di bala
Den oranan di mardugá di djasabra 19 di sèptèmber, 'meldkamer' sentral a risibí notifikashon tokante un kaso di lòsmentu di bala den e área di Nikiboko. Na yegada di polis na e sitio a tuma nota di perforashon di bala na un outo ku ta pertenesé na un agente polisial.
KPCN ta pidi un i tur ku por a mira, tende òf sa algu tokante e kaso aki pa yama 715 8000 òf e liña di tep anónimo 9310.
KPCN ta tuma tur kaso di arma di kandela na serio i no ta tolerá ningun tipo di agreshon, menasa òf uso di arma di kandela kontra agente polisial òf habitantenan di Boneiru, Sint Eustatius i Saba.
Investigashon ta andando.
Detenshon pa manehá mientras reibeweis ta konfiská
Djasabra 19 di sèptèmber, alrededor di 2.25 or di mardugá, a detené un hòmber di inisial A.J.A. di 29 aña di edat riba Kaya Neerlandia. Polis a mira e sospechoso ta manehá un outo mientras su reibeweis ta konfiská pa motibu di manehá bou di influensia di alkohòl. A detené e sospechoso i a konfiská e vehíkulo.
Detenshonnan pa menasa ku arma
Den oranan di anochi di djabièrnè 18 di sèptèmber a detené kuater ménor di edat pa menasa, violashon di Lei di Arma di kandela BES i pa komplisé den e kaso. Ta trata di 4 mucha hòmber di respektivamente 14, 15, 16 i 17 aña di edat. A detené e sospechosonan despues ku a drenta notifikashon tokante un kaso di menasa ku arma di kandela na Kaya Modesta. Investigashon den e kaso ta kontinuá.
Kòntròl planiá di tráfiko
Den oranan di atardi di djabièrnè 18 di sèptèmber, a tene kòntròl di tráfiko riba Kaya Grandi. Durante e kòntròl a para i kontrolá 20 outo i dos skuter. A duna 5 shofùr but pa manehá sin reibeweis bálido, pa manehá sin seguro bálido i pa manehá sin plachi di number dilanti. Kòntròlnan di tráfiko ta kontinuá.
