A pasa lòs bala
Den oranan trempan di mainta di djaluna 28 di sèptèmber, ‘meldkamer’ sentral a risibí notifikashon tokante un kaso di lòsmentu di bala riba un kas na Kaya Kalipso. Den oranan di mardugá habitantenan a skucha tiru i mainta a konstatá perforashon di bala prosedente di un arma di kandela na e kas i un outo. No tabatin herido. Investigashon den e kaso ta andando.
KPCN ta pidi tur persona ku a mira, tende òf tin informashon tokante e kaso aki pa tuma kontakto ku polis na 715 8000, 717 8000 òf via e liña di tep anónimo 9310.
Vehíkulonan konfiská pa motibu di ripitishon di but
Djaluna 28 di sèptèmber, alrededor di 1.45 or di mardugá, polis a para un outo riba Kaya Gutu pa kòntròl rutinario. E shofùr no por a mustra un reibeweis i tampoko dokumentunan di seguro. Despues di investigashon mas aleu a resultá ku diferente biaha polis a para e shofùr aki i dun’é but. Pa e motibu aki a konfiská e outo.
Djasabra 26 di sèptèmber, alrededor di 10.15 or di mainta, polis a para un pikòp riba Kaya Paris pa kòntròl rutinario. A duna e shofùr but pa manehá sin reibeweis, sin faha di seguridat bistí i sin plachi di number dilanti. Ademas a inform’é ku e no por manehá e vehíkulo i mester yama un otro persona. Algun ratu despues, a mira e mesun shofùr den e vehíkulo riba Kaya Korona. A bolbe par’é i duna but pa manehá sin reibeweis i sin plachi di number dilanti. A konfiská e vehíkulo.
Detenshonnan pa manehá bou di influensia di alkohòl
Durante e fin di siman ku a pasa, polis a detené kuater(4) shofùr pa manehá bou di influensia di alkohòl.
Djadumingu 27 di sèptèmber, alrededor di 9.10 or di anochi, a detené un hòmber di inisial L.J.R.P. di 35 aña di edat riba Bulevar Gobernador N. Debrot. Un patruya a para e sospechoso pa kòntròl despues ku a konstatá ku e tabata kore zeilu riba kaminda i mustra komportashon sospechoso di manehá. Durante kòntròl, e shofùr tabata mustra karakterístikanan di un persona ku ta bou di influensia di alkohòl i a hasi un tèst di supla kuné. A resultá ku tabatin indikashon ku e sospechoso a konsumí mas alkohòl ku ta pèrmití pa lei. Na warda di polis a hasi un análisis di rosea kuné i a konfiská su reibeweis.
Djasabra 26 di sèptèmber, alrededor di 11.15 or di anochi, a detené un hòmber di inisial F.B.S. di 47 aña di edat riba Kaya Nikiboko Nort. E sospechoso tabata enbolbí den un aksidente di kua el a kore dal ku su pikòp den un bòrchi di tráfiko. Konforme e maneho di ‘botsen is blazen’, a hasi tèst di supla kuné i tabatin indikashon ku e sospechoso a konsumí mas alkohòl ku ta pèrmití pa lei. A detené i a hib’é warda di polis pa un análisis di rosea. Despues di investigashon mas aleu a resultá ku anteriormente na dos okashon a detené e sospechoso pa manehá bou di influensia di alkohòl i e tabata manehá mientras su reibeweis ta konfiská. Pa e motibu aki awor a konfiská su vehíkulo tambe.
Djasabra 26 di sèptèmber, alrededor di 9.10 or di anochi, a detené un hòmber di inisial J.H.T.V. di 41 aña di edat riba Kaya Papa Cornes. E sospechoso tabata enbolbí den un aksidente ku su pikòp. Konforme e maneho di ‘botsen is blazen’, a hasi un tèst di supla kuné i tabatin indikashon ku e sospechoso a konsumí mas alkohòl ku ta pèrmití pa lei. A detené i a hib’é warda di polis pa un análisis di rosea. A konfiská su reibeweis.
Djasabra 26 di sèptèmber, alrededor di 8.20 or di anochi, a detené un hòmber di inisial J.E.V.B.G. di 50 aña di edat na Hanchi Amboina. E sospechoso tabata enbolbí den un aksidente ku solamente daño material entre dos outo. Konforme e maneho di ‘botsen is blazen’, a hasi tèst di supla ku ámbos shofùr i a resultá ku e sospechoso a konsumí mas alkohòl ku ta pèrmití pa lei. A detené i a hib’é warda di polis pa un análisis di rosea. A konfiská su reibeweis. E otro shofùr enbolbí den e aksidente a haña but pa manehá sin seguro bálido.
Ademas, tur sospechoso detené a haña prosèsferbal pa manehá bou di influensia di alkohòl.
Ladronisia di bateria di ‘fatbike’
Djasabra 26 di sèptèmber a drenta keho tokante ladronisia di bateria di un baiskel eléktriko ‘fatbike’. E fatbike tabata stashoná dilanti di un establesimentu di hóreka riba Kaya C.E.B. Hellmund na momentu ku deskonosínan a bai ku e bateria. Ta investigando e kaso.
Aksidente entre outo i skuter
Djasabra 26 di sèptèmber, alrededor di 1.50 or di mèrdia, ‘meldkamer’ sentral a risibí notifikashon tokante un aksidente entre un outo i un skuter riba Kaya Neerlandia na altura di Kaya Rex. Pasahero di e skuter a resultá heridá. Personal di ambulans a duna tratamentu i hasi chekeo médiko ku ámbos persona ku tabata riba e skuter na e sitio mes i no mester a transportá nan pa hòspital. Konforme e maneho di ‘botsen is blazen’, a hasi tèst di supla ku ámbos shofùr i no tabatin indikashon tokante uso di alkohòl. Dokumentunan di ámbos shofùr tabata na òrdu.
Persekushon ta terminá ku detenshon
Den oranan di anochi di djabièrnè 25 di sèptèmber, alrededor di 9.50 or, polis a mira un quad/raptor riba Kaminda Tras di Montaña. Debí ku tabatin motibu pa kontrolá orígen di e vehíkulo, polis a duna e shofùr señal pa para. E shofùr no a duna oído na e òrdu di polis, a hisa velosidat i a sigui kore den direkshon di Playa, loke a resultá den un persekushon.
Na altura di Kaya Caribe i Kaya Amsterdam, e shofùr a subi un tereno i a trata di hui. E patruya a sigui e quad/raptor for di un distansia i despues a logra blòki’é riba Kaya Caribe. Komo konsekuensia, e quad/raptor a dal den e vehíkulo polisial. A detené e shofùr, un hòmber di inisial J.J.B.B. di 18 aña di edat pa no kumpli ku òrdu di polis. A konfiská e quad/raptor.
Despues ku a transportá e sospechoso pa warda di polis, un grupo di persona a presentá en konekshon ku e detenshon. Durante e insidente aki, a insultá i menasá agentenan presente, i stroba trabou di polis. A detené un hòmber di inisial Q.A.M.W. di 38 aña di edat pa no kumpli ku òrdu di polis, menasá un ámtenar den funshon i pa resistí detenshon.