Vehíkulo konfiská despues di vários infrakshon di tráfiko
Djárason 30 di sèptèmber, alrededor di 03:35 di mardugá, polis a kontrolá un vehikulo riba Kaya Finlandia. Durante di e kontròl a konstatá ku e shofùr no tabata disponé di un seguro bálido i ku e vehíkulo no tabata tin plachi di number parti dilanti.
Anteriormente den e luna aki, durante un kontròl a duna un but pa maneha e mesun vehíkulo sin un seguro bálido i sin plachi di number bálido.
Pa motibu di infrakshon ripití a konfiská e vehíkulo. E shofùr a bolbe risibí un ‘proces-verbaal’ pa manehá sin un seguro bálido i sin plachi di number
Detenshon pa maneha bou di influensia di alkohòl
Djamars 29 di sèptèmber, alrededor di 03:55 di mardugá, polis a kontrolá un vehíkulo na Kaya Nikiboko Zuid durante di un kontròl di tráfiko.
Durante di kontròl e shofùr a mustra diferente señal ku tabata indiká ku e tabata bou di influensia di alkohòl. A duna e shofùr oportunidat diferente biaha pa hasi un tèst di supla, pero despues di diferente intento no a logra hasi tèst di supla bálido.
Pa e motibu aki a detene e shofur, un hòmber di inisial H.D.B.W. di 42 aña pa manehá bou di influensia di alkohòl.
Kiebro den negoshi
Djaluna 28 di sèptèmber a hasi denunsia di kiebro i ladronisia na un negoshi na Kaya Kilowot. For di e denunsia a resultá ku probablemente e kiebro a tuma lugá djasabra 26 di sèptèmber entre 10:30 pa 11or di anochi.
Na e negoshi a enkontra un bentana kibrá. Ademas a konstatá ku a bai ku e kaha di sèn kèsh.
Riba imágen di kámara por mira personanan deskonosí drenta e negoshi via di e porta parti patras.
Investigashon den e kaso ta kontinuá.