Menasa na establesimentu di hóreka
Riba djaweps promé di òktober alrededor di 5 or di atardi, meldkamer sentral a risibí notifikashon di menasa na un establesimentu di hóreka. Na e sitio a sali na kla ku un diskushon a surgi entre dos persona. Durante e interkambio di palabra, a menasa un di nan ku morto.
E víktima a tuma kontakto ku polis pa hasi denunsia pa menasa di morto. Polis ta investigá e kaso.
Ladronisia for di outo
Djabièrnè 2 di òktober alrededor di 7 or di mainta, meldkamer sentral a risibí notifikashon di ladronisia di un Toyota Vitz shinishi for di Kaya Filomena. E vehíkulo tabata stashoná dilanti di un kas, riba djaweps 1 di òktober, alrededor di 5’or di atardi.
E kaso ta bou di investigashon.
Ladronisia di pikòp
Djaweps promé di òktober alrededor di 10 or di mainta, a entregá un keho pa ladronisia di un Toyota Hilux koló kòrá na un supermerkado. E vehíkulo tabata stashoná miéntras ku tabata baha merkansia for di dje.
Momentu ku un ratu despues e personanan enbolbí a regresá, parse ku a bai ku e pikòp. Den e baki di karga di e pikòp ainda tabatin berdura i fruta. E kaso ta bou di investigashon.
A konfiská ‘fatbike’
Riba djabièrnè 2 di òktober alrededor di 2 or di mardugá, un patruya polisial riba Kaya J.E. Nicolaas a opservá un ‘fatbike’ ku tabata kore sin lus parti dilanti. E koredó no tabata trapa e pedalnan i tabata kore ku un velosidat kalkulá di mas ku 25 kilometer pa ora.
A hiba e ‘fatbike’ warda di polis pa un investigashon tékniko. Un prueba riba un ròlbank a revelá ku e vehíkulo por a alkansá un velosidat di 40 kilometer pa ora sin asistensia di pedal. A konfiská e ‘fatbike’.
Kandela di mondi
Riba djárason 30 di sèptèmber, meldkamer sentral a risibí notifikashon di un kandela den un mondi den besindario di Kaminda di Lagun.
Na yegada a bin konstatá ku palèt i palu tabata na kandela. Brantwer a presentá na e sitio i a paga e kandela.
Aksidente
Riba djárason 30 di sèptèmber alrededor di 3.50 or di atardi, meldkamer sentral a risibí un notifikashon di un aksidente unilateral riba Kaya Socrates. Na e sitio a bin konstatá ku un outo a kore bai dal den muraya di un kas. Personal di ambulans a presentá na e sitio i a transportá e shofùr pa hospital pa chekeo médiko mas aleu.
Di akuerdo ku e maneho di ‘botsen is blazen’, a hasi un análisis di rosea serka e shofùr. For di esaki a resultá ku no tin indikashon di uso di alkohòl.
Detenshon pa menasa i vandalismo
Riba djárason 30 di sèptèmber alrededor di 10.10 or di mainta, meldkamer sentral a risibí un notifikashon di un maltrato riba Kaya Neerlandia. Na e sitio, esun ku a yama a deklará ku a menas’é ku un opheto mas trempan e mainta ei i ku a destruí e bentana dilanti (windshield) di su vehíkulo.
Polis a lokalisá e sospechoso un ratu despues na un snèk situá na Kaya Neerlandia. Un hòmber di 47 aña di edat di inisialnan R.D.B. a keda detené pa menasa i vandalismo. A haña un skrufdrai den un vehíkulo ku, segun e víktima, a usa durante e menasa. A konfiská e skrufdrai.
Polis ta hasiendo mas investigashon den e kaso.