Aksidente entre motosaikel i kabritu
Djaluna 5 di òktober alrededor di 7:10’or di mainta, ‘meldkamer’ sentral a risibí notifikashon di un aksidente di tráfiko riba Kaminda Tras di Montaña.
Na e sitio di aksidente a konstatá ku un motosiklista a dal kontra di un kabritu i seguidamente a kai. E motosiklista a resultá heridá i a hib’é hòspital ku ambulans pa tratamentu médiko.
A sera un parti di e kaminda temporalmente pa investigashon. Despues di terminá e investigashon a habri e kaminda bèk pa tráfiko.
Prosès ferbal pa violashon di orario di sera
Djaluna 5 di òktober alrededor di 1:10’or di mardugá, a bin deskubrí durante di un inspekshon ku un establesimentu di hóreka riba Kaya Dr. J.G. Hernandez tabata habrí ainda despues di e orario permití pa ta habri i ainda tabatin hende presente.
A pidi esnan presente pa bandoná e establesimentu. A traha prosès ferbal kontra e doño pa a violá e orario di siere stipulá den e pèrmit.
Detenshon despues di aksidente den palu di koriente
Djadumingu, 4 di òktober, alrededor di 9:20’or di anochi, ‘meldkamer’ sentral a risibí notifikashon di un choke riba Kaya Kampana, na altura di e krusada ku Kaya Macario Sint Jago.
Na e sitio a konstatá ku un outo a dal den un palu di koriente. E palu a risibí daño den esaki i a kousa interupshon di koriente den e área den besindario. E shofùr no tabata na e sitio mas na momentu ku polis a yega, pero a mèldu su mes poko pas despues na e sitio mes.
Di akuerdo ku e maneho di ‘botsen is blazen’, a hasi un tèst di supla serka e shofùr. Esaki a revelá ku el a konsumí mas alkohòl ku ta permití legalmente. A detené e shofùr pa manehá bou di influensia di alkohòl.
E servisionan relevante tabata na e sitio pa atendé e asuntu mas aleu.
‘Hit & run’ vehíkulo stashoná
Riba djasabra, 3 di òktober, alrededor di 10’or di anochi, ‘meldkamer’ sentral a risibí un notifikashon di un hit & run riba Kaminda La Union.
Na e sitio parse ku a dal den un pikòp stashoná. E otro vehíkulo a kore bai despues di e choke.
Ta sigui investigá e kaso mas aleu.
Aksidente entre outo i pikòp
Riba djasabra, 3 di òktober, alrededor di 5:50’or di atardi, ‘meldkamer’ sentral a risibí notifikashon di un aksidente riba Kaya Lodewijk Gerharts.
Na yegada di polis na e sitio, parse ku un outo i un pikòp a dal den otro. E outo a haña daño na su banda drechi.
Di akuerdo ku e maneho di ‘botsen is blazen’ a hasi un tèst di supla serka e shofùr. E resultadonan a mustra ku no tabatin uso di alkohòl.
Ladronisia di spil di banda di outo
Riba djasabra 3 di òktober a entregá un keho tokante ladronisia di dos (2) spil di banda for di un outo stashoná den un lugá di stashoná outo riba Kaya General C.M. Piar.
E doño a stashoná e vehíkulo einan e anochi anterior i a deskubrí e siguiente mainta a kita tur dos (2) spil di banda bai kuné.
E kaso ta bou di investigashon.
Detenshon pa vandalismo
Djabièrnè 2 di òktober alrededor di 3:40’or di atardi, a detené un mucha hòmber di 16 aña pa vandalismo na un instituto riba Bulevar Gobernador N. Debrot.
Na e instituto, a destruí entre otro un (1) banki, dos (2) porta di glas i un (1) pòchi di mata. Relashoná ku e notifikashon i despues di investigashon na e sitio, a detené e sospechoso mas lat e atardi ei.
Investigashon den e kaso aki ta andando.