Detenshon pa intento di asesinato
Djamars 6 di òktober, alrededor di 10.20’or di anochi, durante un kontròl di tráfiko na Kaya Dr. J.G. Hernandez, polis a duna un shofùr señal pa para. E outomobilista a ignorá esaki i kore ku velosidat haltu den direkshon di 2 agente polisial. E agentenan mester a move un banda pa evitá un aksidente. Despues di esaki, shofùr di e vehikulo a sigui kore i polis a start un persekushon.
Poko ratu despues, polis a topa ku e vehíkulo i a detené e hòmber di inisial M.W.A.G. di 32 aña bou di sospecho di intento di asesinato. Polis a konfiská e vehíkulo pa investigashon mas aleu.
E kaso ta bou di investigashon.
Kòntrol di velosidat na dos sitio
Djamars 6 di òktober, entre 11.00 or di mahinta i 1.00 or di mèrdia, polis a tene kòntròl di velosidat riba E.E.G. Boulevard i Kaminda Tras di Montaña.
Riba E.E.G. Boulevard a kòntrolá 30 vehíkulo. 4 shofùr tabata kore mas lihé ku e velosidat máksimo permití di 40 km/u. E velosidat mas haltu ku a midi tabata 62 km/u.
Riba Kaminda Tras di Montaña a kòntrolá 35 vehíkulo. 3 shofùr tabata kore mas lihé ku e velosidat máksimo permití di 60 km/u. E velosidat mas haltu ku a midi tabata 84 km/u.
A traha prosès-ferbal pa tur 7 shofùr.
Aksidente entre outo i fatbike
Djamars 6 di òktober, “meldkamer” sentral a risibí notifikashon tokante un aksidente entre un outo i un fatbike riba Kaya Neerlandia.
Durante e aksidente shofùr di e fatbike a resulta heridá. Na yegada di polis na e sitio, shofùr di e outo no tabata presente mas.
Ta investigando e kaso aki.
Aksidente entre outo i skuter
Djamars 6 di òktober alrededor di 6:50 or di anochi, ‘meldkamer’ sentral a risibí notifikashon tokante un aksidente entre un outo i un skuter riba Kaya Nikiboko Noord.
Na e sitio a konstatá ku ámbos vehíkulo a dal den otro ora den birada. E dokumentonan di ámbos shofùr tabata na òrdu. A hasi un tèst di supla serka tur 2 shofùr, ku no a mustra indikashon di uso di alkohòl.
Aksidente riba Kaya Korona
Riba djamars 6 di òktober, alrededor di 5:20’or di atardi, ‘meldkamer’ sentral a risibí notifikashon tokante un aksidente entre 2 outo riba Kaya Korona.
Polis a presentá na e sitio i a dirigi tráfiko na e sitio di aksidente. Durante e kontròl, a konstatá ku un di e shofùrnan no tabatin un seguro bálido. E shofùr a haña un but pa esaki.
Sospechoso detené despues di ladronisia di pikòp
Djaweps promé di òktober, alrededor di 10’or di mainta, "meldkamer" sentral a risibí notifikashon tokante ladronisia di un Toyota Hilux koló kòrá na un supermerkado. E vehíkulo tabata stashoná miéntras tabata baha merkansia for di dje. Den e baki di karga tabatin, entre otro, berdura i fruta.
Alrededor di 11:30’or di mainta, polis a risibí un tep/notifikashon tokante e sito unda e vehíkulo hòrtá lo por ta. Polis a lokalisá e pikòp na Kaya Bongo i a konfiská esaki pa investigashon mas aleu. A transportá e vehíkulo pa warda di polis.
Durante e investigashon, un hòmber di inisial J.J.M. di 37 aña a bini dilanti komo sospechoso. Poko ratu despues, polis a lokalisá e sospechoso na Kaya Kuarta i a pasa ofer na su detenshon.
Mas lat, ku outorisashon di Ministerio Públiko, polis a entregá e pikòp bèk na e doño.
E kaso ta bou di investigashon