KRALENDIJK – Siman di Regatta a kuminsá. Tur aña e festividatnan ta atraé hopi bishitante pa sentro di Kralendijk. Entidat Públiko Boneiru (OLB), Kuerpo Polisial Hulanda Karibense (KPCN) i Ministerio Públiko (OM) ta traha huntu pa sòru ku e festividatnan ta kana na un manera seif. Pa esaki a tuma èkstra medida di seguridat i durante Regatta lo tin supervishon intensivo. Lo aktua konsekuentemente kontra infrakshonnan i disturbio di órden públiko.

Mas presensia di polis na tera i riba laman

Durante Regatta, lo tin patruya èkstra di polis aktivo riba i den besindario di e tereno di evento. Den e área di evento, agentenan polisial lo patruyá na pia i riba baiskel. Den e áreanan den besindario di e tereno, lo patruyá tambe ku outo di polis i bròmer. Riba laman tambe lo tin supervishon, den kolaborashon ku partnernan di Tim Multidisiplinario Marítimo Hub Boneiru (MMHB).

Pa motibu di e presensia amplio aki, polis lo ta visibel na diferente lugá i por aktua rápidamente na momentu ku ta nesesario. E énfasis ta riba prevenshon di insidente, identifiká situashonnan ku no ta seif na tempu i intervení direktamente na momentu ku seguridat ta na peliger.

Akshon severo kontra infrakshon

Durante Regatta lo aktua severamente kontra infrakshon i komportashon ku ta stroba órden públiko òf pone seguridat di bishitante, partisipante, empresario i personal di servisio di emergensia na peliger.

Polis lo mantené kòntròl amplio i lo aktua kontra tur infrakshon i echo kastigabel ku nan konstatá. Dependé di e situashon, lo tuma medida adekuá.

Prohibishon temporal di glas pa seguridat di bishitantenan

Pa redusí e riesgo di herida- i insidentenan di violensia, gezaghèber di Boneiru a imponé un prohibishon temporal di glas durante Regatta. Bòter di glas i otro bebida den bòter glas por kousa herida grave ora di insidentei por usa esakinan komo arma.

E prohibishon di glas ta konta den e áreanan indiká den sentro di Kralendijk, for di 11 di òktober te ku 18 di òktober 2026 pa 06.00 or di mainta, tur anochi entre 6 or di atardi pa 06.00 or di mainta.

Den e áreanan aki ta prohibí pa tin bebida den bòter di glas , sea ku nan ta habrí òf será. Ta prohibí tambe pa establesimentunan di hóreka sirbi i bebida den bòter di glas. Sinembargo, uso di glas normal pa bebe ta keda pèrmití, tantu paden di e establesimentunan di hóreka komo riba nan terasa.

Supervishon ku kámara i listramentu preventivo

Ademas di ekstra presensia visibel di polis, durante Regatta lo hasi uso di kámara di vigilansia den e área di evento. Esaki ta yuda polis pa identifiká riesgonan di seguridat na tempu i aktua rápidamente den kaso di insidente.

Tambe tin un òrdu pa listramentu preventivo na vigor. Di 11 te ku 18 di òktober 2026, entre 6 or di atardi i 6 or di mainta, polis tin outorisashon pa hasi listramentu preventivo den e áreanan designá. Esaki ta nifiká ku polis por kontrolá personanan, nan paña, tas i ekipahe, tambe vehíkulonan, sin ku mester tin un sospecho spesífiko.

Tur hende ta obligá di koperá ku e kòntròlnan aki. Si bo ninga di koperá, esaki ta un echo kastigabel i lo resultá den detenshon i persekushon penal.

Huntu nos ta sòru pa un Regatta seif

OLB, KPCN i OM ta hasi un yamada na tur bishitante, partisipante i empresario pa kontribuí na un transkurso seif di Regata. Kumpli ku e reglanan vigente, sigui instrukshonnan di polis i sòru pa akseso i rutanan pa servisionan di emergensia keda liber.

E tres instansianan ta traha huntu pa garantisá órden públiko i seguridat durante e festividatnan. E énfasis ta riba prevenshon i presensia visibel, pero polis lo aktua konsekuentemente i ku determinashon kontra komportashon ku ta stroba órden públiko òf pone seguridat di otro na peliger.

Regatta ta un fiesta di i pa henter Boneiru. Huntu nos ta sòru pa tur hende por disfrutá di e festividatnan na un manera seif.