KRALENDIJK -Resientemente Kuerpo Polisial Hulanda Karibense (KPCN) a risibí motosaikel di polis nobo. E motosaikel ta un adishon riba e flota éksistente di vehíkulonan polisial i ta kontribuí na mas fleksibilidat, miéntras ku e ta fortalesé e visibilidat di polis riba kaya. Durante siman di Regatta, e tim di motosaikel lo ta visibel pa promé biaha riba karetera públiko na Boneiru.
E motosaikel nobo ta ékipa ku e ‘striping’ di polis, sirena i bòrchinan di informashon spesial ku ta pèrmití agentenan duna instrukshon na demas usuarionan di kaminda. Di e manera aki, e motosaikel ta fásil pa rekonosé komo vehíkulo polisial i por hasi uso di dje pa vigilansia i mantenshon di lei den tráfiko.
Mas rápido i fleksibel den akshon
E motosaikelnan nobo ta brinda agentenan mas posibilidat pa aktua di manera fleksibel i efektivo. Danki na e fasilidat pa maniobrá ku e motosaikel, agentenan por move mas fásil di un sitio pa otro, asta durante momentunan di hopi tráfiko òf na lugánan kaminda outo di polis no por yega fasil. Di e manera aki, nan por reakshoná mas lihé riba notifikashonnan, sostené koleganan durante insidentenan i hasi vigilansia na diferente lokalidat. Por hasi uso di e motosaikel pa patruyanan preventivo, kòntròl di tráfiko i vigilansia durante eventonan.
E motosaikel di polis ta un adishon balioso dor di kombiná e velosidat i mobilidat di un outo polisial ku e aksesibilidat di un patruya na pia òf riba baiskel. Asina, agentenan por move rápidamente di un sitio pa otro, miéntras ku nan ta keda visibel i aksesibel pa komunidat.
Promé presensia visibel durante Regatta
Durante siman di Regatta, e tim di motosaikel lo ta visibel riba karetera públiko pa promé biaha. E motosaikelnan ta bin aserka banda di e otro patruyanan di polis ku lo ta aktivo durante e festividatnan, ku e meta pa garantisá órden públiko i seguridat den tráfiko.
Ku e adishon aki, KPCN ta dal un paso importante pa dilanti den efektividat di operashon di polis na Boneiru. E motosaikelnan nobo di polis ta brindá mas posibilidat pa aktua rápidamente ora komunidat tin mester di polis.