KRALENDIJK - En konekshon ku e aktividat di Buskamentu di Pampuna i diferente evento relashoná ku selebrashon di ‘Halloween’, Kuerpo Polisial Hulanda Karibense (KPCN) ta hasi un yamada na tur persona pa tene kuenta ku nan propio seguridat i di otronan. Durante e aktividatnan aki, di kua hopi mucha, hóben i adulto ta riba kaya, ta importante pa tur persona kumpli ku e reglanan vigente di trafiko i tene kuenta ku seguridat di otro.
Seguridat den tráfiko tin prioridat
KPCN ta enfatisá ku e reglanan di tráfiko ta keda na vigor durante e eventonan. Polis ta hasi yamada na shofùrnan pa adaptá nan komportashon di manehá na e situashon di tráfiko i tene èkstra kuenta ku otro usuarionan di tráfiko, spesialmente muchanan i otro peaton.
Polis ta hasi un apelashon pa tene kuenta spesífikamente ku e siguiente reglanan di tráfiko:
Transporte den pikòp: Ta prohibí pa transportá persona den baki
di pikòp.
Fatbike: Shofùrnan di fatbike tambe mester kumpli ku e reglanan
vigente di tráfiko. Ademas, nan mester sòru pa iluminashon
adekuá, spesialmente den skuridat.
- Transporte den pikòp: Ta prohibí pa transportá persona den baki di pikòp.
- Fatbike: Shofùrnan di fatbike tambe mester kumpli ku e reglanan vigente di tráfiko. Ademas, nan mester sòru pa iluminashon adekuá, spesialmente den skuridat.
- Velosidat: Shofùrnan mester adaptá nan velosidat na e situashon di tráfiko i tene kuenta ku presensia di muchanan i otro usuarionan di tráfiko.
- Manehá bou di influensia: Ta prohibí pa manehá un vehíkulo bou di influensia di alkohòl òf otro supstansianan narkótiko.
- No ta tolerá pa manehá di forma imprudente òf peligroso. Dependé e situashon, esaki por resultá den konfiskashon di e vehíkulo.
No ta pèrmití ningun tipo di arma, ni arma falsu
Den kuadro di seguridat, KPCN ta rekordá tur persona ku no ta aseptá arma di kandela (òf falsu), ni arma blanku, ni tampoko ora esaki ta parti di un disfras di Halloween. Ophetonan ku ta parse arma di kandela real por kousa situashonnan peligroso i mal entendimentu.
Respeta otro i e ambiente
Banda di seguridat den tráfiko, KPCN ta pidi atenshon pa komportashon respetuoso durante e eventonan. Ta importante pa e aktividatnan transkurí di un forma agradabel i seif pa tur persona. P'esei, respetá propiedat i privasidat di otro. No ta pèrmití pa drenta kas òf subi tereno privá sin outorisashon.
Polis ta hasi un yamada na mayornan i tutor pa guia nan muchanan si ta nesesario i hasi nan konsiente di e importansia pa komportá nan mes na un manera seif i ku rèspèt.
Mèldu iregularidat via 911
Ta hasi yamada na tur persona pa keda alerta i tuma kontakto mesora ku polis via 911 den situashonnan sospechoso, komportashon peligroso òf otro iregularidat.
Seguridat ta un responsabilidat di nos tur. Ku rèspèt mutuo i komportashon responsabel, e aktividat di Buskamentu di Pampuna riba djasabra 24 di òktober i otro fiestanan di Halloween den e dianan benidero, por transkurí na un manera seif i agradabel.