Polis di Hulanda Karibense (KPCN) ta usando bodycam for di aña 2025. Agentenan polisial ta usa e kámaranan portátil aki durante trabou, ku e meta pa oumentá transparensia, seguridat i aktuashon profeshonal.
Riba e página aki bo por lesa kiko e uso di bodycam ta nifiká pa bo komo siudadano, ki derecho bo tin, i kon bo por tuma kontakto ku nos si bo tin kualkier pregunta òf keho.
Bo derechonan komo siudadano
Si bo ta rekonosibel riba un grabashon di bodycam, bo tin sierto derechonan bou di e Lei Dato di Polis (Wet politiegegevens, Wpg). Den e kaso ei, ta konsiderá bo komo un ‘persona involukrá’ (Artíkulo 1 bou di g Wpg).
- Derecho riba informashon (Artíkulo 25 Wpg)
Bo por hasi petishon por eskrito si – i si ta asina, kua – datonan personal tokante dibo a prosesá pa polis, inkluyendo kualke grabashon di bodycam. - Derecho di akseso na dato
Si bo aparesé riba grabashon di kámara, bo por pidi akseso na bo imágennan. Aki ta konta lo siguiente:- Mester hasi otronan riba imagen, inrekonosibel promé.
- Por nenga akseso si esaki ta nesesario pa ehekushon di tareanan polisial, protekshon di otronan òf seguridat di estado (Artíkulo 27 Wpg).
- Derecho riba korekshon òf eliminashon
Bo ta kere ku a prosesá e datonan inkorekto, inkompleto òf ilegal? E ora ei bo por pidi pa mehorá, komplementá, protehá òf eliminá esaki.
Bo ke entregá un petishon?
Bo debernan komo siudadano
Ounke bo tin sierto derechonan, tin algun kuadronan bon kla:
- Bo no por eksigí ku un agente polisial no por/mag di graba mientras e ta ehekutá su tareanan polisial.
- No ta permití pa bo pidi imágennan di bodycam pa uso òf publikashon privá, a ménos ku abo, komo persona involukrá, por demostrá un interes legítimo pa hasi esaki.
- Intenshonalmente stroba un agente ku ta usa un bodycam (p.e. purba blòkia òf kita e kámara) ta kastigabel.
Bo ke entregá un keho tokante bodycam?
Bo ta sinti ku a filmá bo inhustamente, ku a prosesá imágennan inkorektamente òf ku a violá bo derechonan? E ora ei bo por entregá un keho.